Noticias
O PP pide ao goberno local que solicite as axudas da Xunta para levar a cabo proxectos municipais que adapten a nosa cidade ao cambio climático e ás altas temperaturas
ppou - 26-Febreiro-2025 - 17:40:47 0 comentarios 
• As axudas do goberno galego permiten aumentar a biodiversidade dos espazos urbanos, plantar novas especies autóctonas, instalar pavimentos naturais para atenuar o efecto ‘illa de calor’, implantar novos espazos abertos, crear xardíns verticais e mellorar os entornos verdes e os paseos fluviais”, explica a edil Inma Moreiras
• Os populares xa solicitaron no mes de maio do ano pasado, a través dunha moción, ademais destas medidas, outras a curto prazo como: adaptar espazos municipais e galerías comerciais como refuxios climáticos; instalar de elementos téxtiles para facer sombra nas rúas peonis e aumentar as fontes de consumo público. Polo que instan tamén ao alcalde a implementalas para conseguir unha estratexia integral
• “É necesario tamén pór en marcha programas preventivos para diminuir o impacto das altas temperaturas porque hai días que superamos os 40ºC e se non estamos protexidos as consecuencias na saúde reflíctense en mareos, debilidade, fatiga, e os golpes de calor asocianse en moitos casos a severos problemas multiorgánicos”, indica a concelleira
21 de febreiro de 2025.O Grupo Municipal Popular reitera ao goberno local que adapte a cidade ao cambio climático e protexa á veciñanza das vagas de calor que sofre Ourense na época estival, principalmente á máis vulnerable. Unha solicitude que os populares fixeron en maio do ano pasado no salón plenario e na que agora volven insistir porque a Xunta acaba de anunciar axudas de ata 60.000 euros por concello para levar a cabo proxectos neste ámbito.
“O que permiten estas axudas é aumentar a biodiversidade dos espazos urbanos, plantar novas especies autóctonas, instalar pavimentos naturais para atenuar o efecto ‘illa de calor’, implantar novos espazos abertos, crear xardíns verticais e mellorar os entornos verdes e os paseos fluviais”, explica a edil Inma Moreiras.
Galicia convértese así na primeira comunidade autónoma que conta cun instrumento propio de planificación e actuación para pór en valor os ecosistemas urbanos e mitigar os efectos derivados do quentamento global. “Xa que o Concello non quixo investir cartos o ano pasado para facer fronte ao cambio climático e ás temperaturas extremas, o que lle solicitamos é que aproveite estas axudas que serán moi beneficiosas para os cidadáns”, indica a concelleira.
Os populares instan tamén ao goberno local a que implemente a maiores as outras medidas a curto prazo que propuxo o Partido Popular no pleno do mes de maio. “Ademais destas medidas que agora financia a Xunta, tamén propoñíamos a adaptación de espazos municipais (bibliotecas, salas de exposición ou centros cívicos) e galerías comerciais como refuxios climáticos; a instalación de elementos téxtiles para facer sombra nas rúas peonis e o aumento de fontes de consumo público en toda a cidade”, lembra Inma Moreiras.
Medidas que, tal e como destacan dende o PP da cidade, tamén serían moi beneficiosas para a veciñanza, sinxelas de levar a cabo e de baixo custe. “O que precisamos é unha estratexia integral porque é imprescindible que nos adaptemos ao cambio climático e as temperaturas da época estival. Na nosa cidade hai moitos días nos que alcanzamos os 40ºC, incluso en xullo do ano pasado chegamos a 43ºC, e se non estamos protexidos as consecuencias na saúde reflíctense en mareos, debilidade, fatiga, e os golpes de calor asocianse en moitos casos a severos problemas multiorgánicos”, asegura a edil.
Por último, o grupo municipal popular insiste de novo en que o goberno local solicite canto antes as axudas da Xunta porque é urxente actuar antes de que chegue a época estival.
O PP de Ourense informa acerca das axudas autonómicas ao comercio local e autónomos
ppou - 18-Febreiro-2025 - 14:57:05 0 comentarios
• O responsable de Comercio no executivo galego, Gabriel Alén, explicou polo miúdo todas as achegas dispoñibles e remarcou o compromiso do Goberno autonómico co tecido comercial
18, febreiro, 2025. O PP de Ourense celebrou esta tarde un encontro informativo para dar conta a comerciantes e autónomos das diferentes liñas de axuda abertas para este sector por parte do Goberno galego. O encontro, que se desenvolveu no Centro Cultural Marcos Valcárcel, estivo dirixido polo responsable de Comercio do executivo galego, Gabriel Alén Castro, quen remarcou o compromiso da Xunta co tecido comercial.
 |
Alén Castro detallou polo miúdo unha ampla batería de medidas, explicando inicialmente a orde de 3,9 millóns de euros para promover a dixitalización, a innovación e a sustentabilidade do tecido comercial e artesanal, que cobre actuacións como a implantación e mantemento web, marketing dixital, loxística, reformas do espazo comercial, sistemas de eficiencia enerxética ou compra de embalaxes reciclables, entre outras. O prazo de presentación de solicitudes estará aberto dende o vindeiro 26 de febreiro ao 26 de marzo.
Tamén fixo referencia a que desde mañá -ata o 19 de marzo- pódense solicitar as axudas dirixidas especificamente aos centros comerciais abertos, cun orzamento de 2,5 millóns de euros e coas que se busca primar a calidade e a excelencia das propostas de dinamización destas figuras clave do ecosistema comercial. Como novidade este ano prevé axudas extraordinarias de 50.000 € para recoñecer o labor dos mellores CCA, co obxectivo de apoiar campañas adicionais que teñan como fin promover o comercio local e chegar a novos clientes
Gabriel Alén explicou que este ano tamén se avanzará na creación do rexistro e reconfiguración dos centros comerciais abertos, con nova denominación e imaxe propia, concibida desde unha dinamización integral das contornas comerciais
Ademais, recalcou que tamén sobresae a aposta da Xunta polas prazas de abastos. “O Consello da Xunta de onte avaliou a nova convocatoria orientada a ampliar a rede de mercados recoñecidos con este distintivo de calidade. A orde pasa a bianual para concellos e triplica o orzamento ata os 3,3M € ante o previsible incremento de solicitudes para a realización de obras de mellora, tras o aumento no 2024 das solicitudes de diagnose”, explicou.
As achegas, que poden pedir municipios, asociacións, cooperativas ou federacións, promoven tanto actuacións de mellora dos Mercados Excelentes como accións dirixidas a acadar o selo —aumentando ata unha axuda máxima de 320.000 €—. De feito, estes apoios quedan enmarcados no Plan estratéxico do comercio 2025-2030, que se prevé ter listo neste primeiro trimestre de 2025, e que inclúe outras accións como o programa Vilas Vivas, que arrancou en Ribadavia no pasado mes de decembro de xeito piloto.
Para reforzar estas medidas, Gabriel Alén incidiu en que a Xunta vén de pedir colaboración ao Goberno central, insistindo en que Galicia poida acceder a fondos Next Generation que o Executivo ten reservados e sen executar.
ORDE UNIFICADA DE AXUDAS PARA AUTÓNOMOS
Tamén salientou a orde unificada de axudas para autónomos -cunha ampla presenza no comercio local- impulsada pola Xunta, cunha dotación de máis de 40 millóns de euros, co obxectivo de avanzar na simplificación administrativa e na redución de carga burocrática para este colectivo.
Esta orde engloba cinco programas de axudas que abranguen desde o inicio da actividade ata a súa consolidación e mantemento, pasando pola conciliación, a nova oportunidade para aqueles que queira Volver intentalo e o apoio á remuda xeracional de negocios en funcionamento. Para facilitar a tramitación destas axudas implementouse un chatbot de intelixencia artificial para facilitar a resolución de dúbidas en tempo real para as persoas autónomas en relación coa tramitación destas axudas.
O grupo provincial do PP insta a garantir os postos de traballo dos empregados da empresa Faurecia ante o seu futuro incerto nun sector que é “motor principal” para a provincia e para Galicia
ppou - 18-Febreiro-2025 - 14:56:07 0 comentarios
• O grupo popular critica a deslocalización cara a outros países con man de obra máis barata, pese a que as empresas automobilísticas se benefician de fondos europeos do vehículo eléctrico
• “Debemos protexer ao sector ourensán fronte a outras potencias, con actividade industrial e con proxectos”, destacan dende o grupo popular
18, febreiro, 2025. O grupo provincial do Partido Popular vén de rexistrar unha moción para o pleno ordinario da Deputación de Ourense do próximo 28 de febreiro para instar ao Grupo FORVIA a garantir o mantemento dos postos de traballo do persoal que actualmente forma parte da empresa. Os populares defenderán no pleno o apoio aos empregados da empresa Faurecia Auromotive España S.A do Polígono de San Cibrao das Viñas ante o seu futuro incerto. Para o grupo popular, o sector da automoción, especialmente coas compañías auxiliares, ten “un peso importante na provincia”, polo que “non se debe permitir que un dos motores principais de Galicia e de Ourense se desmantele”.
O PP defenderá no pleno da Deputación o apoio a estes empregados de Faurecia, onde se fabrican paneis de porta, taboleiros de abordo, guarnicións e ebanistería para automóbiles. Son preto de 300 empregados que traballan de maneira exclusiva en Ourense para Stellantis, a industria de Vigo.
A caída da produción automobilística e o estancamento previsto de cara ao 2030, debido a que non se están a renovar os postos dos que se xubilan e vanse ver reducidos inmediatamente a contratación e o reaxuste de plantillas. Ademais, Stellantis retirou a adxudicación dun novo vehículo á planta de Ourense, trasladándoo a un país “low cost”, o que supón que a carga de traballo que tiñan os empregados ourensáns ata 2028 chega ao seu fin.
Con esta redución da carga de traballo, en favor de deslocalizar cara a outros países con man de obra máis barata -pese a que estas empresas se beneficia de fondos europeos a través do PERTE do vehículo eléctrico- as consecuencias para os empregados ourensáns de Faurecia están sendo moi negativas.
“Debemos protexer ao sector ourensán fronte a outras potencias, con actividade industrial e con proxectos”, destacan dende o grupo popular.
Ademais de instar a Forvia a garantir os postos de traballo, o PP provincial tamén acorda instar á Xunta de Galicia a que reclame ao Goberno central que deseñe convocatorias de axudas para o sector da automoción e industrias auxiliares, a fin de que garantan o emprego de proximidade e eviten a deslocalización.