Noticias
Eleccións Locais 2019: Manuel Baltar: “Ourense será pioneira e referencia nacional e internacional para as políticas de reto demográfico”
ppou - 23-Maio-2019 - 19:02:17
• O presidente provincial do PP e candidato á presidencia da Deputación, Manuel Baltar, destacou a inclusión no programa de goberno 72-73 de medidas específicas para facer fronte ao desafío demográfico, “ámbito que xa neste mandato estivo presente en todos os plans de apoio aos concellos”.
23, maio, 2019.
“A provincia de Ourense será pioneira e referencia nacional e internacional en investigación, análise e posta en marcha de políticas de reto demográfico”, dixo hoxe o presidente provincial do PP e candidato á presidencia da Deputación, Manuel Baltar, que destacou a inclusión no programa de goberno 72-73 de medidas específicas para facer fronte ao desafío demográfico, “ámbito que xa neste mandato estivo presente en todos os plans de apoio aos concellos”.
Como exemplo das políticas desenvolvidas polo PP a través da súa acción de goberno provincial, Manuel Baltar fixo unha mención expresa ao proxecto EmprendOU, aprobado hoxe mesmo pola Xunta de Goberno da institucional provincial, e que poñerá 2 millóns de euros para financiar con fondos europeos ata 250 plans de autoemprego e emprendemento de mozos de entre 16 e 31 anos, que residan nos 82 municipios da provincia de menos de 5.000 habitantes.
“Estes son os feitos que os gobernos do Partido Popular poñemos sobre a mesa á hora de xestionar”, defendeu o presidente provincial do PP, que expresou o seu orgullo por conseguir “un dos avances máis importantes das últimas décadas para o conxunto das provincias europeas”. Referiuse así a unha das novidades do novo marco financeiro plurianual da UE, “onde as provincias non só exercemos como xestoras de fondos comunitarios, senón tamén como receptoras directas desde Bruxelas”.
Un logro destas características, engadiu, “só é posible cando se ten unha perspectiva global de provincia e dáselle visibilidade, como así fixemos con Ourense, presidindo a Asociación Europea de Gobernos Provinciais, Partenalia, e colaborando co Comité Europeo das Rexións”. Pero non só no ámbito público, senón tamén da man da sociedade civil, o goberno provincial de Manuel Baltar afrontou este tema “cooperando coa Cátedra de Reto Demográfico da International Business School, á que a Asociación Española de Xornalistas de Medio Rural xa anunciou a súa intención de contribuír.
O reto demográfico, explicou, “ocupa unha parte moi importante do programa de goberno 72-73, pois se vincula con moitas das 124 medidas que inclúe o plan”, como a creación dunha área e dunha comisión específicas para este tema dentro da estrutura da Deputación, así como a posta en marcha de destacados programas como o Observatorio Internacional do Medio Rural que, en colaboración coa Universidade de Vigo, “permitirá converter a Ourense nun laboratorio de ensaio para as políticas comunitarias, dado que o escenario actual da provincia será a foto fixa da UE en 2050”.
Se no mandato recentemente finalizado “xa puxemos en marcha iniciativas que non teñen o resto das deputacións galegas, como o plan de natalidade, durante o próximos catro anos -dixo o presidente do PP- abriranse para Ourense un amplo abanico de oportunidades, con nichos de emprego en ámbitos estratéxicos para a nosa provincia como os servizos sociais e o termalismo”.
MITINS EN LAZA, MONTERREI, SANDIÁS E A RÚA.
Logo do mitin central celebrado onte en Ourense, cualificado por Manuel Baltar como “unha demostración máis da fortaleza política do PP”, os populares continuaron a súa axenda de campaña nos concellos de Laza, Monterrei, Sandiás e A Rúa.
En Laza, o presidente popular afirmou que o candidato á alcaldía, José Ramón Barreal, “destaca pola súa capacidade para formular iniciativas baseadas nas potencialidades do concello, como o feito de que Laza sexa ligazón coa Gudiña, a través do Camiño de Santiago, coa Vía da Prata”, sen esquecer de citar o AVE.
José Luis Suárez, candidato á alcaldía de Monterrei, tamén estivo arroupado polo presidente provincial, para quen o tamén alcalde “demostrou ser capaz de xerar sinerxias de colaboración con outras administracións, como a Deputación e a Xunta, en asuntos non só de interese local senón tamén provincial”.
Xa en Sandiás, Manuel Baltar afirmou que “o vindeiro domingo os veciños terán a oportunidade de regresar á senda do progreso nun concello que sempre estivo gobernado polos populares ata este último mandato”.
A Rúa tamén foi escenario dun mitin máis, coa intervención de Avelino García, presidente da xunta local do PP; Miguel Santalices, coordinador de política autonómica; Álvaro Fernández, candidato á alcaldía; e o secretario xeral do PP ourensán, Rosendo Fernández.
Eleccións Locais 2019: Manuel Baltar propón un novo pacto con Ourense “para lograr unha maioría que permita gobernar sen depender de ninguén”
ppou - 22-Maio-2019 - 17:54:48
• O presidente provincial e candidato á presidencia da Deputación pediu a “inmensa confianza dos ourensáns” durante o mitin central que os populares celebraron no pavillón dos Remedios, onde se deron cita preto de 3.000 persoas, “nunha nova demostración da forza que nos caracteriza e nos diferenza doutras formacións”, e no que interviron o candidato á reeleción para a alcaldía de Ourense, Jesús Vázquez, e o presidente do PPdeG, Alberto Núñez Feijóo.
• Como partido de goberno, dixo Baltar, “demostramos ter altura de miras á hora de sacar adiante proxectos de enorme importancia para os veciños de calquera concello, pero iso non foi posible na cidade, onde só vimos intereses partidistas fronte ao interés xeral da cidadanía”.
22, maio, 2019.
O presidente provincial do PP e candidato á presidencia da Deputación, Manuel Baltar, propuxo hoxe un novo pacto con Ourense “para lograr unha maioría que permita gobernar sen depender de ninguén”, ofrecendo a estabilidade necesaria para desenvolver un proxecto “que ten unha visión integradora da provincia, partindo da cidade e chegando a todos e cada un dos concellos”.
Manuel Baltar pediu así a “inmensa confianza dos ourensáns” durante o mitin central que o Partido Popular celebrou hoxe nun ateigado pavillón dos Remedios, onde se deron cita preto de 3.000 persoas, “nunha nova demostración da forza que nos caracteriza e nos diferenza doutras formacións”, e no que interviron o candidato á reeleción para a alcaldía de Ourense, Jesús Vázquez, e o presidente do PPdeG, Alberto Núñez Feijóo.
O presidente provincial popular pediu aos veciños da capital que aposten “polo diálogo, polo talante, pola educación e pola cooperación institucional que avalan os gobernos provincial e autonómico con maiorías absolutas”, en contraposición ao comportamento dos partidos da oposición na corporación ourensá “que convertiron en infames estes anos de mandato”.
Como partido de goberno, dixo Manuel Baltar, “os populares demostramos ter altura de miras á hora de sacar adiante proxectos de enorme importancia para os veciños de calquera concello, pero iso non foi posible na cidade, onde só vimos mans en alto para votar en contra das grandes solucións para Ourense, prevalecendo os intereses partidistas fronte ao interés xeral da cidadanía”.
Cun goberno local forte e coa institución provincial e maila administración autonómica como aliados, “os ourensáns terán a cidade que merecen, innovadora, preparada para un fito histórico como a chegada do AVE e destino turístico de primeira orde, co termalimso como bandeira”. Nesta liña, engadiu, o Partido Popular ofrece unha candidatura liderada por Jesús Vázquez, “que demostrou dabondo a súa capacidade para procurar a cooperación das administración”, citando expresamente o único comité permanente de cooperación existente en España entre unha capital de provincia e a Deputación, “o que permitiu incluír ao Concello de Ourense no plan provincial de obras, manter o Festival Internacional de Cine ou traer para a cidade o Centro Galego de Innovación da Formación Profesional”.
EXERCICIO DE AUTOESIXENCIA PARA O GOBERNO DA PROVINCIA.
En clave de provincia e como candidato á presidencia da Deputación, Manuel Baltar pediu o apoio dos ourensáns “para que o próximo domingo alcancemos os obxectivos que nos propuximos ao inicio desta campaña, nun exercicio de autoesixencia que non está ao alcance dos resto dos partidos”.
Así, Baltar aludiu ás 71 alcaldías que aspira a conseguir o PP como récord histórico, unha porcentaxe de apoio electoral no entorno do 50 % e manter a maioría absoluta na Deputación.
O voto ao Partido Popular o próximo domingo “permitiranos escoller a os nosos alcaldes e alcaldesas, pero tamén ao presidente da institución provincial”, subliñou, lembrando que a fiabilidade do proxecto popular tamén está na única candidatura presentada á presidencia da Deputación “e co único programa de goberno coñecido, o plan 72-73, que inclúe 124 medidas das que tamén se beneficiará a capital”.
Eleccións Locais 2019: Mariano Rajoy visitará Ourense para participar nos mitins de peche de campaña do Partido Popular
ppou - 21-Maio-2019 - 21:25:21
• O presidente de honra do PPdeG percorrerá as rúas da capital e intervirá nos mitins de Celanova e Xinzo de Limia.
21, maio, 2019.
O presidente de honra do PPdeG, ex presidente do PP nacional e ex presidente do goberno de España, Mariano Rajoy, visitará Ourense o venres, día 24, para participar nos actos de peche de campaña das eleccións locais que, para esta data, ten previstos o Partido Popular ourensán, apoiando aos candidatos locais e ao candidato á presidencia da Deputación, Manuel Baltar.
Mariano Rajoy iniciará a súa visita pola tarde, cun paseo polas rúas da cidade de Ourense, para a continuación desplazarse ao mitin que se celebrará en Celanova. O seu percorrido concluirá en Xinzo de Limia, onde a primeiras horas da noite intervirá no mitin de peche de campaña dos populares ourensáns.
O presidente provincial do PP, Manuel Baltar, puxo en valor a presenza de Mariano Rajoy, “que sempre respondeu á nosa chamada para apoiar ao partido, aos seus candidatos e aos proxectos que presentamos en cada unha das citas electorais”.